كارثة ٢٠١٧

للأسف احنا دايما بنستنى الكارثة تضرب قبل ما نصير نحضّر للكارثة الجاي.

سألنا حالنا، لما يضرب زلزال مدمر فلسطين، شو رح نعمل؟ لما تسقط كثير من المباني الأثرية والبيون القديمة اللي الاحتلال بيمنع ترميمها، شو رح نعمل؟ لما تسقط نص بنايات كفر عقب اللي مبنية بطريقة عشوائية، شو رح نعمل؟

الموضوع مش موضوع تحزير. فلسطين قاعدة على صدع زلزالي بيضرب كل شي ٩٠ سنة. طبعاً الهم سنين بيحذروا من زلزال وما في حد (على الأقل عندنا) مكلف خاطره انه يعمل دراسة تاريخية حقيقية للزلازل اللي ضربت المنطقة. كل بيحكي عن زلزال ١٩٢٧ وبعدين خلاص الباقي تحصيل حاصل، تجميع تواريخ.

خلينا نرجع نتطلع على تاريخ الزلازل المدمرة بفلسطين قد ما قدرت الاقي مصادر (باستثناء الصغيرة)

١١\٧\١٩٢٧ ضرب زلزال مركزه مدينة أريحا. نابلس صارت بالأرض. ٥٠٠ فلسطيني راحوا ضحية الزلزال. وطبعاً القدس اتأثرت، واصاب المسجد الأقصى وكنيسة القيامة أضرار. اتخيلوا اليوم مع كل الأنفاق تحتهم شو بصير.

galilee_earthquake_the_times_wednesday_apr_12_1837

توثيق الزلزال ظهر بكتابات وليام مكلور ثومسون

١\١\١٨٣٧ ضرب زلزال مركزه مدينة صفد. المدينة اتدمرت وقرى كثير حوليها صارت بالأرض، ٥٠٠٠ فلسطيني راحوا ضحية الزلزال. اذا أخذنا بعين الاعتبار انه عدد السكان وقتها كان تقريبا ٣٠٠ ألف، أقل او أكثر، يعني بنحكي عن ١٪ – ٢٪ من السكان، يعني بقياس اليوم، في تقريباً ٦ ملايين – ٧ ملايين فلسطيني بفلسطين. يعني أكثر من ١٠٠ ألف ضحية.

٣٠\١٠\١٧٥٩ ضرب زلزال مدمر لبنان وفلسطين، أظن مركزه كان جبال الشوف بلبنان. وصل الزلزال لفلسطين خصوصاً طبرية وعكا وصفد. وراح ٢٠٠٠ قتيل بصفد.
الزلزال اللي مركزه فلسطين بيضرب لبنان واللي مركزه لبنان بيضرب فلسطين. مش ضروري أشرح ليش. اللي وثق الزلزال هو جون كيتو.

ما لقيت توثيق لزلازل ١٦٥٦ و١٥٤٦ و١٤٠٢ و١٣٣٩.

٢٠\٥\١٢٠٢ من أكثر الزلازل تدمير، مركزها سوريا. بعض الاحصاءات بتقول انه راح ضحيتها أكثر من مليون. بس في تقديرات بتحكي ٣٠ ألف بس، والعدد المبالغ فيه كان لأنه شملوا ضحايا المجاعة اللي صابت المنطقة وقتها. وصل تأثير الزلزال لصقلية.

١١\١٠\١١٣٨ زلزال حلب، من أكثر الزلازل تدميراً في التاريخ. أكثر من ٢٠٠ الف راحوا ضحيتها. عادة بيوصفوه بثالث زلزال من حيث القوة التدميرية في تاريخ العالم. وثق لهذا الزلزال حمزة ابن القلانسي.

١٠٦٨ دمر زلزال مدينة الرملة بالكامل. أكثر من ٢٥ ألف راحوا ضحية الزلزال.

بنوقف لهون، بس دايماً الزلازل الكبيرة كان يلحقها زلزال ثاني خلال ٢٠ سنة تقريباً. الزلازل بين المتوسطة والكبيرة (اللي دمرت مدن وقرى) اللي ضربت فلسطين بسبب تحرك صدع البحر الميت هي:

زلزال جبال الشوف ١٩٥٦، زلزال أريحا ١٩٢٧، زلزال حيفا ١٨٩٨، زلزال الجليل ١٨٣٧، زلزال الشرق الأدنى ١٧٥٩، زلزال ساحل سوريا وفلسطين ١٧٥٢، ١٦٦٦، ١٦٥٦، ١٥٤٦، ١٤٠٢، ١٣٣٩، زلزال الجزر بين عكا وطرابلس ١٢٦١، زلزال سوريا ١٢٠٢، زلزال قيسارية ١١٧٠، زلزال حماه ١١٥٧، زلزال حلب ١١٣٨، زلزال الساحل ١٠٩١، زلزال البقاع ١٠٧٠، زلزال وادي عربة ١٠٦٨، زلزال الشام ١٠٦٣، زلزال الرملة ١٠٣٣-٣٤ (استمر ٤٠ يوماً)، زلزال القدس ويافا ١٠١٦، زلزال الساحل ٨٨١، زلزال دمشق ٨٤٧، زلزال القدس ٨٠٨، زلزال الجليل ٧٤٦-٧٤٩ (مجموعة زلازل)، زلزال غزة وعسقلان ٦٧٢، زلزال سهل اليرموك ٦٣٣، زلزال بيروت ٥٥١، زلزال انطاكية ٥٢٦، زلزال ٥٠٢، زلزال كفر قاسم ٤١٩، زلزال الجليل ٣٦٣، زلزال ساحل الشام ٣٠٦، زلزال قيسارية ١٣٠، زلزال يبنا وقيسارية ١١٥، زلزال غور الأردن ٣١ قبل الميلاد، زلزال صور ١٤٠ قبل الميلاد.

الزلازل المدمرة ما كان بينها ٩٠ سنة، كان أقل.

الخلاصة، كل واحد يجهز حاله للزلزال. الزلزال مش زي الثلجة، بتقدرش تتوقعها. هي بتضرب فجأة. صحيح ممكن تصير كمان ٢٠ سنة بس ممكن تصير كمان دقيقتين. وسلطة الاحتلال مش معنية فيك تحضرك، بالعكس، الزلزال هم بيستنوه لاعادة هيكلة المدن والقرى تحت حجج اعادة البناء بعد الزلزال. وسلطتي فتح وحماس ما عندهم الكفاءة يحضروك، اصلاً بيتعاملوا مع موضوع الزلزال كإنه قصة اسطورية، وممكن يعطوك الوجه الجدي بس تيجي سيرته اذا كان في من وراها شحدة.

وعكل حال اذا الزلزال ما صار بـ٢٠١٧، هاي الامريكان متوقعين حرب بالربيع وبتعاملوا على هالأساس، وسلطات الاحتلال بتحضر المدارس بخطط طوارئ جديدة. فجهز حالك لهالموضوع. وأهم اشي بأي حالة تسأل نفسك من هلكيت. لما يجي الزلزال ولا تيجي الحرب، أنا شو رح يكون دوري؟ استنى أوامر من جهة ولا جاهز اقوم بالدور اللي بقدر عليه؟ طب شو هو الدور اللي بقدر عليه؟

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s