عشرة أسرار للاستمتاع بحفل فني

أكثر شي بيزعجني هون اني بفضل اسمع الموسيقى أو أحضر مسرحية لحالي بغرفتي عن انه أروح على المسرح.

المسرح اشي بهم بحياة المجتمعات. مكان الناس بتتجمع مع بعض بتمارس عمل جامع. فعل الاستمتاع بالفن مع بعض، أو الضحك مع بعض. أهميته بنفس أهمية انه العيلة تتجمع حوالين الطاولة يتعشوا سوا.

بس المشكل هون حضور حفلة هو فعل أناني، ولا حد بخلي حد يستمتع بأي حفل فني. كله بروح مفكر حاله قاعد بحمامه بيسمع لحاله. أو قاعد بحفلة خاصة هو اللي دافع حقها.

مشان الله تخلونا نستمتع كلنا سوا، بلاش الأفلام تبعتكم. انه بتصقفوا عكل وتر بينضرب..انه شو نفهم انك انسان ذويق موسيقى بشكل خرافي فاهم كل رنة. طيب صبابة، انت فاهم موسيقى ..بس وفر تصفيقك بصير.

المهم، في عشر أسرار عشان الكل يستمتع بالحفل الفني، وعشان انت نفسك تستمتع صح:

١) أول شي طبعاً، لما حد عم بغني أو بيعزف، بينفع تستنى حتى تخلص الوصلة قبل ما تزقف. بعرف انك فاهم كل كلمة وكل نغمة ومعجب فيها، بس استمتع بالعمل ككل..اهدى طول بالك حتى آخر الوصلة بعدين بنصقف سوا..واللي ما عجبته الوصلة مش ضروري يزقف. ولو بتحضر مسرحية بلاش تزقف عكل كلمة أو تعمل عرس عكل نكتة..اضحك بالعقل..مش رح نستغبيك انك مش فاهمة النكتة …بعرف دمك خفيف وحدق. ومعلش امسك قحتك حتى الوصلة تخلص..مش رح تنخنق..بلاش اقعد بس استمتع بعزف القحقحة طول الحفلة.

وبلش تقعد تغني مع المغني…بعرفك انك حافظ الكلمات بس أنا مش جاي اسمعك..سلامة صوتك. ومش ضروري نحكي انه بلاش تقعد تزقف مع النغمة يا أبو أذن موسيقية. بس آسف ما عندنا شواغر، المغني جاب معه كل العازفين اللي بيحتاجهم. بتقدر تقدم طلب بعد الحفلة انك تكون ايقاع مع الجوقة.

ومعلش خليك مدفي كرسيك بلاش نطنطة لأنه انت مش بسهرة عرسك. إلا اذا حفلة هشك بشك…خد راحتك دمّر الدنيا.

٢) بلا منه التصفير اللي ما اله طعمة كل ثانيتين، لا انت قاعد بالشارع بتنادي على كلب..ولا هاي سهرة عرس صاحبك اللي بدك تورجيه انك أعز اصحابه لأنك أكثر شخص عجقه بهالحفلة

٣) بينفع يعني لمقامك انك توصل الحفلة قبل بنص ساعة من ما تبدأ، معلش يختي، بتقدري تكوني اجتماعية وتقعدي اتدردشي مع صحابك قبل الحفلة أو بتقدر يا خي تكون اجتماعي شوي وتتعرف عالناس. مش ضروري يعني تيجوا خبط لزق أول ما تبلش الحفلة أو بعد بخمس دقايق..سلامة قدرك اسم الله عليك..مش رح يقلل من قيمتك لو اختلطت بعامة الشعب ووصلت بكير.

٤) قصة “كاتبين الحفلة بتبلش على الـ٧ يعني مش رح تبلش قبل الـ ٨..” ممكن تنسيلي اياها. قصة “مواعيد عرب..” بلا منها..مش عارف ليش بنحب نتمسك بأسوأ العادات ونقعد المسا نسبسب على العرب وعاداتهم. الحفلة بتبلش على الـ٧ يعني خليها تبلش على السبعة..فكون قاعد عكرسيك ٧ إلا عشرة..إلا خمسة. خلي الحفلة تبلش على الوقت. ولو في ربع ساعة استراحة بالنص..بلاش تقعد اتدخن نص ساعة بره..أو تناقش مواضيع حساسة تصير ملتزم اتخلص النقاش…كمل نقاشك بعدين معلش.

٥) بلاش اتناقش بنص الحفلة أو المسرحية كيف تعابير وج هالانسان..أو النغمة اللي ما عجبتك وشو أصل النغمة وأول حد ضربها والخ الخ..ما تفتحوا حوارات. اسمعوا واتذوقوا اللي بتحضروه، وبعدين بتطلعوا تتعشوا وناقشوا تفاصيل التفاصيل..وروح يا عمي العشى علي.

٦) انت انسان مهم بالحياة، هاي مفروغ منها. وكل الناس بتحب تحكي معك كل الوقت، و بان كي مون بيقدرش ياخد قرار غير ما يرجعلك..بس معلش بهالساعة ساعتين اطفي موبايلك..أو اقطع صوته نهائي..وخليهم يرنوا عليك قد ما بدهم..انت مشغول ومش فاضي..اذا كنت بتقدرش تمسك نفسك..خلاص ما تيجي الحفلة..شغلها عاليوتيوب بتصير ترد عالتلفون قد ما بدك..بس بلاش تحسسنا انه العالم بيقدرش يستغني عنك…اعطي الناس اللي واقفين على المسرح شوية اهتمام.

٧) معلش التشبس والقراميش توفرهم لحتى تكون عتختك بتحضر لحالك. بلاش أكون قاعد اسمع موسيقى قدامي وموسيقى نشاز جنبي! قنينة مي بتكفيك. غير هيك مش رح تموت من الجوع أو العطش.

٨) الكرسي اللي قاعد عليه وركّايته مشتركة بينك وبين اللي جنبك هو للكل….بلاش تفرش..مش قاعد كنباية بيتك…شوي بتمد رجليك. وعفكرة ركبك لما تحطها على الكرسي اللي قدامك بحس فيها اللي قاعد على الكرسي..بعرف انك خفيف..بس خف علينا شوي كمان.

٩) معلش وانت طالع من الحفلة لو التقيت بصديق طفولتك اللي مش شايفه الك عشرين سنة بلاش توقفوا على الباب تتذكروا أيام الطفولة. كملوا مشي واوصلوا على الساحة وبعدين قضوها صبّاحي تتذكروا ذكريات الطفولة. وبلاش وانت طالع كل ما توصل كرسي بدك تسلم وتبوس كل شخص..بنعرف انك انسان محبوب جداً..فخليك محبوب وبلاش تزود عدد الناس اللي بسبّوا عليك.

١٠) واخيراً بهنيك انك بدك تعود أطفالك على الذوق الرفيع ..بس عودهم عليه بالبيت. الأطفال بدهم يلعبوا ويصرخوا…هم هيك يا خي..بس انا مش مجبور فيهم. معلش حطهم عند حماتك الله بعينك!

خلينا كلنا نستمتع مع بعض نطلع كلنا مبسوطين وبلاش أنانية وأفلام.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s