خوف

خوف مالوش مبرر..خوف من الوحدة لما تشوف حواليك ناس كبار بالعمر بآخر العمر أو حتى بمنتصف العمر بس المرض وصلهم للآخر، بس حتى بنص مرضهم ما في حد حواليهم. ما عندهم صحاب ولا حباب، طول عمرهم قضوه بدون ما انه يعملوا صحاب، أو يحافظوا عليهم.

بتخاف من الوحدة، الوحدة اللي فرضتها عحالك وبتفرضها كل يوم. كل حد بيقرب بتبعده عنك، كل حد بحبك بتطفشه.

مش عارف ليش بتعمل هيك؟ لا عارف..الصحبة التزام والحب التزام والقرابة التزام..وبنقدرش تلتزم..

لا لا..بتقدر..بتعرف كيف تلتزم ..بس بدكاش تلتزم..الالتزام متعب..الالتزام بيوقف بوجه شو بدك تعمل بالحياة..

بس برضه الوحدة صعبة..حتى بوسط الناس كلها بتحس بالوحدة. الموضوع مش باللمة..الموضوع بشخص..بكفي شخص… حد يكون الشخص تبعك..بس هاد التزام وبدكاش اياه…

بس مع انه احساس الوحدة صعب..بس باستمرار بتحسس حالك بالوحدة..بتطلع مع صحاب..كثير منهم..وكل حد عنده الشخص تبعه..حبيبه أو حبيبته..أو حتى انسان مقرب اله.

بتقرب من انسانة وبتجمع أغاني اتذكرك بهاي اللحظات عشان لما تبعدها..ترجع تسمع هالأغاني وتحس بالبعد والوحدة…وتلوم الكل…الكل إلا نفسك..

متعب الموضوع…وبدكاش تفضفض عشان تلاقي حل..بدك تفضفض عشان ترجع تتذكر وتحزن عنفسك..الموضوع مثير للشفقة وبائس وبتحبش الشفقة..وبتكرها وبترفضها…بس شو الحل..بدك تصرخ عشان ما يضل جواك…

في أوقات بكون بدك تصرخ بس بدكاش حد يسمع…كل مرة بتكتب وبتكتب وبتلغيه قبل ما تنشره..بس بتحسش انك صرخت من كل قلبك..ونفسك لمرة تصرخ من كل قلبك..

نفسك تصرخ لحد…بس خايف..خايف من ردة الفعل..بدكاش ردة فعل بدك بس تصرخ..بس بدك تحس انك صرخت لحد..بس بدون ما يكون في ردة فعل لهالحد..عشان بتعرف انك رح تبعدها كالعادة..وترجع لنفس الدوامة…

دوامة بترجع بتنعاد ما الها حد..ونفسك تطلع منها ..بس انت فيها بارادتك..لأنها بهالوقت الشي الوحيد اللي بناسبك…

بتقدرش توعد لأنه الوعد التزام..وبتخاف انك تخلف الوعد…وتغرق بكتير وعود..تغرق وماترجع تطلع..

الوحدة بتخوف..بس بتعرفش شو هي الوحدة وكيف تطلع منها…بتقدرش تطلع من الوحدة بوسط اللمة…بتقدرش تطلع غير ما تلاقي الانسان..تبعك ..اللي بتقدر تكون نفسك معه…بس انك تلاقي هالانسان..التزام..بتقدرش عليه..شو الحل؟ ممكن ما في حل..غير اتضل بهالدوامة..وتفعفط فيها عشان ما تغرق

بس مرات بتتعب من الفعفطة وبدك تترك نفسك تغرق…بتترك نفسك تغرق شوي..حتى تقدر تفعفط مرة تانية..وبلكي شي  يوم تسمحلك الظروف انك تختار تطلع من وحدتك..بس وقتها ابصر لو بتكون خسرت كل شخص ممكن يكون هو الانسان اللي قادر يطلعك من وحدتك ولا لأ؟ بتكون وصلت لعمر..كل اللي حواليك عنده الانسان تبعه..وبتقدرش تلاقي الانسان تبعك..

لوقتها بتقدرش غير تكمل هيك..بلا وعود بالوحدة..وتصرخ ..تصرخ..حتى لو بالفراغ..وتقعد تحلم بشو كان ممكن يكون لو الظرف غير…بلكي مش رح تعمر لليوم اللي تكون بدك تطلع فيه من هالوحدة..ومش رح تحتاج تشغل نفسك بانك تلاقي الانسان تبعك..الانسان اللي تعطي وعوده..أو الانسان اللي تفضفضله وتكون بدك تسمع ردة فعله

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s