بالعامية…أنا بدي أرجع لبلادي

قبل 63 سنة ، انتكبنا. تلات أرباع الشعب الفلسطيني انطرد من أرضه. ولما صارت بدها الثورة تبلش عشان تحرر فلسطين و ترجّع شعبو، اتهجّر كمان أكتر وصارت كل فلسطين تحت الاحتلال. استشهدوا كتير و ضحّوا كتير. عشان فلسطين كلها. واليوم وصلنا لوضع محزن. ناس بتتحكم فينا.بتاجر بدم شهداءنا. ناس عملو ملايين ولسّه بدهم يمصّو بدمنا أكتر. شو سوّوا بالشعب؟؟!! كلّو على بعضو. عملو شعب يساوم وبحكي “بالواقعية”. وصار الحكي بالثورة حكي كبير علينا. اللي بيحكي بالثورة صار خاين خارج عن “الصف الوطني”. اللي بيحكي عن الثورة صار متفلسف خيالي. اللي بيحكي عن الثورة صار مدسوس. صار همنا بطنا ورقبتنا. صارت حياة الذل طبيعية. جارك انسجن؟ بعِّد عنو هادا مشكلجي. صاحبك انطخ؟ هادا غبي مفكِّر حالو بدو يعمل ثورة.

صار البعبع هو دم الشهدا. الكل بيحكي باسم دمهم. بتقدرش تحكي ضد أي فصيل. خلاص عشان واحد استشهد لابس بدلت هالفصيل ولّا هداك الفصيل، صار شهيد الفصيل. حتى الشهدا بحرموهم من حقهم انو يكونوا شهدا الوطن. صاروا شهدا الفصايل. وبتسترجي تحكي عن واحد من قيادات الفصائل؟!؟؟ طبعاً لا! بتكون مدسوس، عشان هدول حمّلو الوطن جميلة إنو بيوم من الايام حملو بارودة.

إنت أجندة ايرانية وأنا أجندة سورية وهو أجندة قطرية. ويلااااا خلينا نبلش ببعض تهم. شو ورانا؟! شعب مهجر؟ خلاااص راحت عليهم. واحنا فاضيين؟! أراضي بتنسرق؟ يا عمّي لا، هدول أكيد باعوا…طنش!! خلاص بكفّي الوطن…خلينا نشوف حالنا ونكون مودرن. بننزل نرقص و نهيص على أغاني عن الوطن. وبنزقّف وبنصفّر وبنعمل قنوات فضائية و بنكتب وبنتمسكن للعالم كلّو. خلاص يا عمّي خلينا نكون مرموقين بين العالم. خلينا انطلِّع جواز سفر و نزبط حالنا. بلاش الناس يفكرونا متخلفين!! خلينا نكون متحضرين!!

لأ!!! أنا بدي احكي طز! طز بالفصائل و بالقيادات وبكل واحد مودرن وواقعي! طز بالعالم و بالسياسة و بالرقص! أنا بديش ثورة وناس تركض وراي تهتف. أنا بس كل الحكاية بقدرش أستحمل الذل. أنا قضيتي ما تغيرت وميثاقي ما تغير. أرض فلسطين من النهر للبحر. وقضية فلسطين هي قضية الشعب اللي تهجر و رح يرجع. قضيتي مش سجادة حمرا وعضوية أمم متحدة. ولا قضية مستوطنات وجدار وحواجز. هاي مش القضية. كل هاد بس نتيجة للاحتلال الصهيوني. نتيجة لتهجير الشعب. والشعب بس يرجع والصهيونية تسقط بتنضف فلسطين من آثار الاحتلال الصهيوني.

خلصونا! بدكم تسمّوني عميل مدسوس عندي أجندة؟!؟ احكو طز!! ازا إنتو قضيتكم الدولة إنتو أحرار قاتلو عشانها لحالكم. بس ما تضلكم تحكو باسمي ولا باسم فلسطين. فلسطين مش الضفة وغزة بس!!!!!! إذا ال 11 مليون فلسطيني بدهم يتنازلو عشان يكونوا واقعيين، صبابا! اتنازلوا…بس دشروني!!! أنا مش متنازل عن القدس و يافا وحقي الشخصي فيهم. أنا مش رح أتنازل عن حقي اني أوقف على أسوار عكا وأحكي هاي عكتي. أنا مش رح أتنازل أسبح بطبرية وأحكي هاي ميتي. أنا مش رح اتنازل إنو اطلع عجبل جرمق وأحكي هادا جبلي! فحلّو عني! انا ابن فتح ما هتفت لغيرها؟؟ مبروك عليك، بس أنا ابن فلسطين ما هتفت لغيرها!! حمساوية ما نهاب المنية؟؟ مبروك عليك، بس أنا فلسطيني وسأحمل روحي على راحتي!

ما تناقشني باستحقاق أيلول والدولة!! انت حر باللي بدك اياه بس أنا قضيتي واضحة ومش هي الدولة! اه مش هي الدولة! خلصوني وخلصو حالكم! بس تروحو تعملو الدولة احكولهم هادا الزلمة مش معانا! هادا لحالو! أنا خارج عن الاجماع الوطني؟ إذا هادا هو الاجماع الوطني، اه أنا خارج عنو! بدكم اطخّوني؟ طخّوني! الموت برصاصكم أو رصاص صهيوني هو واحد بالنسبة لإلي.

أنا مش طالع ضد الصهيوني أطالب بحقوقي عشان مستني الملايين تنزل وراي. أنا أناني! نازل عشان حالي! انت بتستحملش واحد يطقِّس عصاحبتك وبتولِّعها نار؟ أنا بستحملش الصهيوني يكون قاعد على أرضي و أنا بتفرج! انتي ما بتستحملي صاحبك يخونك مع بنت تانية ونار الغيرة بتولِّع فيكي؟ أنا ما بستحمل أرضي تكون مع غيري و بولع نيران من جوة مش نار!

روحوا مش رح امنعكم تعملو دولة! بس مشان الله ما توقفوا بطريقي! خلّوني احارب لقضيتي و لحقّي! بدكمش انتو ما حد جابركم! وحيات الله مش رح اتّهمكم انكم عملاء وخونة! بس خلوني احارب الصهيوني ! مش طالب مساعدتكم…بس طالب ما تكونوا انتو والصهيوني علي! صعب احارب كل العالم…بس حتى ولو بدكم تحاربوني…حاربوني! أنا مش رح أوقّف! بس بتجرح كتير اشوف ابن بلدي واقف بوجهي! صعبة كتيررر! فمشان الله شو ما بدكم بعمل! شو ما بدكم بعطيكم! بس خلوني اقاتل عشان ارجّع حقّي!

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s