خبز طابون

ليس بالخبز وحده يحيا الانسان

كيف بيطلبوا منا نساوم ونسالم؟ على أي أساس؟ بدكم تعيشوا؟ بفرقش معكم كيف تعيشوا؟ طيب عيشوا يا خي..هاي السويد بتعطي فيز..هاي كندا بتعطي فيز..روحوا عيشوا غاد بعيد عنّا…ريحة الذل نتنة أصلاً السويد وكندا برد؟ هاي السعودية وقطر بيعطوكم فيز …وفي عندهم مصاري كثير..أه والله بتقدروا تفطروا وتتغدوا وتعيشوا مصاري..بتقدروا تملحوها أكيد بيتحسن طعمها في أمل…

Hope

أمل…

انت الشخص الوحيد اللي بيعطيني امل … أصعب من انه يكون عندك أمل انك تعطي للنالس أمل…الأمل مسؤولية، مين بيقدر يتحملها؟ طب امتن بتخلص صلاحية الأمل؟ طب شو يعني أمل؟ طب الأمل بكفي؟ اللي بيعطيني جواب واحد لأي من هالأسئلة..بردله اياها بجرعة أمل..واللي ما بيعرف يعطيني أي جواب يقلي ..رح أعطيه وعد  “ وهل الفجر…

جد الزيتون

أعلى غصن زيتون

شو بيفكروا وهمّ فوق بجدّوا الزيتون عن آخر غصن؟ شو بيفكروا قبل ما يطلعوا؟ بيفكروا يطلعوا وما ينزلوا؟ لوين بدهم يطلعوا؟ بس ما هو لوين بدهم ينزلوا؟ شو في تحت غير تراب وصرار؟ بتقلي ما في شي بيستاهل، ليش بدك تحررها؟ ليش بدي؟ أنانية ولّا احساس انه واجب؟ ضيعان ولا وضوح رؤية؟ بس عنجد ليش؟…

يوم العودة

في يوم العودة

أمواج ضحكات..دموع..صراخ.. أمواج وجوه..عيون بتلمع..أحلام.. أمواج نازلة من الجبل تغمر البحر.. أمواج جاي من البحر تعانق الشط.. أمواج خالات..عمات وخوات.. أمواج إخوة..خوال وعمام.. المد بيغمر ترابها بليلة ما فيها قمر وجوه مضوية استحى من وهجها القمر ودّعوا غربتهم بدموعهم.. دموع فرح..فرح اللقاء دموع حزن..حزن علّي راح وما عاد راح عشان احنا نعود

فلسطين

ما بهمني

الّي حيطان بيته شجرها..ِ شو بيهمه! الّي سقفه سماها.. شو بيهمه! الّي بيمشي عترابها.. شو بيهمه! الّي بيصحى عتغريدة حساسينها.. شو بيهمه! الّي بيشرب قهوته تحت زيتونها.. شو بيهمه! الّي بيقبل جبينه نسمة هواها.. شو بيهمه! الّي بصبّح عشمسها وبمسّي عقمرها.. شو بيهمه! بكرا..الّي أمله ببكرا.. شو بيهمه!